pumanaw tayo sa dalampasigan
magiliw ang alon
nung sumisid tayo sa lalim
hindi ka na muling umahon
iniwan mo ako sa baybayin
pangahas tayong nangarap
tuklasin ang ating salamangka
hamunin ang mga akala
bakit hindi ka nagpaalam
ng tinawag ka ng bulong
nakita mo na ba ang liyab ng dagat
nasagot mo na ba ang mga bugtong
naaninag kita sa dapithapon ng minsan
sa bungad ng dumarating at lumilisan
naghihintay ka pa ba
naalala mo pa ba tayo
ako na naging ikaw
ikaw na laging ako
pumanaw tayo sa dalampasigan
nakahimlay sa agos ng alinlangan
nakahimlay sa agos ng alinlangan
